Archive for the ‘Música’ Category

Swing of change


27 Dec

Hai uns días falaba cun amigo sobre a capacidade que posúe a música para producir modificacións neurolóxicas, quedou en pasarme “Musicofilia” de Oliver Sacks no que conta en tono divulgativo, na liña de “Pantasmas no cerebro” de Ramachandrán, como o son é capaz de despertar zonas cerebrais danadas. Á espera do libriño, deixovos esta extraordinaria curta na que un barbeiro vai transmutando os seus gustos musicais e mesmo ideolóxicos coa axuda dunha trompeta máxica, maxistral. Swing of change.

Swing of Change from Swing of Change on Vimeo.

Emily Jane White


26 Dec

Emily Jane White é unha das últimas incorporacións ao Neofolk americano, composicións intimistas, arroupadas cunha voz que evoca tristura, conseguen un coctel perfecto para os hipomaníacos. Este tema, na que introduce un cello para facer tambalear aos mais melancólicos, fixoa acreedora dun espazo na base de datos de acústica do blogue.

James Vincent McMorrow


14 Dec

James Vincent McMorrow é un músico irlandés cunha personalísima voz impostada que semella a dun eunuco, editou o seu primeiro CD no 2010 así que é un roockie ao que haberá que darlle un tempo, eu decidín incluílo na base de datos de acústica, aí queda.

James Vincent McMorrow @ Chasing The Moon from Scott McDowell on Vimeo.

The cinematic orchestra


23 Nov

The Cinematic Orchestra son unha banda de Jazz británica que aproxima o seus sons ao indie e á música electrónica. Habitualmente incorporan músicos para redondear as súas composicións con interpretacións excepcionais. O tema “To build a home” pertence á banda sonora de Anatomía de Grey e é interpretado por Patrick Watson. Unha preciosidade.

Dasher Youssef


19 Nov

Delicadeza é o que se me ocorre para describir o concerto de Dasher Youssef, un músico que consegue modulacións vocais próximas aos “mantras” que achegan ao espectador ao trance, unha secuencia rítmica cautivadora e chea de poesía que de pronto sucumbe á mestizaxe de ritmos occidentais. Cunha banda que desborda talento, con Stephane Galland na batería e Kristjan Randalu ao piano, encheu o Círculo de maxia. Onte foi un día grande de Jazz en Lugo, deses que non se esquecen.

Lizz Wright


16 Nov

Tremendísimo concerto onte no Círculo, sen importarlle o obxecto da convocatoria, Lizz Wright prescindiu do Jazz para facer un percorrido polos ritmos indie, soul, country, gospel, funky… Bestial. Cunha banda discreta pero eficaz puxo en pé ao auditorio noutra noite memorable do Festival, moito temos que agradecerlle a Alberto e Cía, non será doado volver a disfrutar de esta poderosísima voz en Lugo.

Lizz Wright – My Heart from GHOST on Vimeo.

Clave de fado


06 Nov

Facía anos que non vía a Pepe Piña,  lembroo facendo covers de Simon e Garfunkel nos vestiarios do club de beisbol Helios xunto a Alberto Leiro, tiñao asociado ao Folk Rock dos 70 pero está claro que Pepe prescinde das taxonomías, onte fun velo ao “Clavi” co grupo “En clave de fado” un concerto precioso construído coa sensibilidade de quen sabe movilizar emocións a través da música, alí descubrín a Iria Estévez, unha cantante bestial que non acabo de entender como non pasou os castings de Luar na Lubre, teño unhas ganas tolas de escoitar a Paula Rey para coñecer a maxia de quen eclipsou a poderosísima voz de Iria. En fin, unha noite doce de fados que aínda gardo no meu padal.

CLAVE DE FADO en TVG

Pepe Piña | Myspace Music Videos

Lionel Loueke


27 Out


Lionel Loueke é un músico de Jazz con raíces afro que fai experimentos coa guitarra e a voz conseguindo unhas testuras musicais fantásticas. No vídeo coloca uns papeis entre as cordas da “ovation” para incrementar o efecto da percusión. Un luxo.

Plink


19 Out

Facía tempo que non posteaba xogos, pero levo un pedazo enganchado a este artefacto de software que deseñou Dinahmoe para Chrome (seguramente necesitedes este navegador para probalo). Plink é un sintetizador interactivo que permete “xogar” simultaneamente con varios usuarios, sobre unha base melódica sinxela vas introducindo os instrumentos que che apetezan premendo nas cores da esquerda. Absolutamente adictivo.

Stone sour


14 Out

Sempre pensei que os grupos de heavy compoñían as mellores baladas do mundo, unha especie de exercicio de autodisciplina para contrastar a agresividade que os caracteriza. A semana pasada Guille, batería dos “No Nation“, envioume esta delicatessen acústica dos “Stone sour” un grupo de hard rock no que ademais militan o vocalista e o guitarra de “slipknot“, cousas veredes.

Thomas Dybdahl


06 Out

Thomas Dybdahl é un musico noregués que pasou por distintas bandas sen pena nin gloria ata que se emancipou para darlle unha nova perspectiva a súa carreira como guitarrista, a súa voz ten un timbre doce, que tanto pode resultar cautivador como empalagoso, a min chamoume a atención o seu estilo melódico e a sencillez dos temas que se deixan escoitar mentras traballas como unha banda sonora relaxante.

Youn sun Nah


24 Set

Cover do “Jockey Full of Bourbon” de Tom Waits interpretado pola cantante coreana Youn Sun Nah. Unha voz do Jazz que dará moitísimo que falar. Esta muller non comezou a cantar ata os 27 anos e o fixo dun xeito azaroso presentándose a un casting para unha comedia musical, de calquera xeito tiña unha carga xenética propicia, o seu pai foi director do Coro Nacional de Corea e a súa nai cantante,  un bagaxe que xustifica a súa expresión xenética musical. Os rexistros da súa voz son infinitos, un auténtico prodixio.

Biel Ballester Trío


22 Set

Na líña do Gipsy Jazz ou Manouche, como lle chaman os franceses, descubrín a través dun amigo a Biel Ballester Trío, uns dignísimos herdeiros do estilo de Django Reinhart. Por Lugo pasaron, nunha desas semanas de Jazz memorables, os Django Reinhart  Tributo facendo un espectacular concerto a 3 dedos que epatou a audiencia, Biel atópase dentro dese pequenísimo grupo de virtuosos da música que manteñen vivo o Gipsy Jazz neste país.

Ryan Bingham


17 Set

Ryan Bingham é un vaqueiro curtido nos rodeos e reconvertido a músico de country, a súa poderosa voz aguardentosa dalle un carisma especial aos temas , eu escollín para este post o cover de “The Weary Kind” da película “Crazy Heart”, pero o seu último traballo “Junky Star” xunto a banda “The Dead Horses” merece moito a pena.

the xx


10 Ago

Hoxe veu verme o meu sobriño Aitor, outro dos que entran en “fnac” e desconectan da vida para mergullarse horas enteiras entre vinilos, libros e tecnoloxía, porno en estado puro imposible de eludir, de alí trouxome este fantástico agasallo musical, “The XX” unha banda londinense que grabou no 2009 un CD memorable que non deixo de escoitar, auténticox talentox.

apnea

Un mergullo na rede